Hoe gewoontes jou gesondheid raak

Die mens is die produk van sy gewoontes (creature of your habits).

Hierdie frase het jy al by my gehoor en gaan jy nog baie lees. Byna alles wat ons is en nie is nie, bereik of nie bereik nie, wat met ons gebeur of nie gebeur nie, wat ons aantrek of wegstoot, is die gevolg van ons gewoontes.

Dit is dus nie net van toepassing op ʼn gesonde leefstyl, ʼn gesonde liggaam, verslanking of om fiks te word of bly nie. Dit is van toepassing op elke ander area van ons lewe.

Maar vandag praat ons oor ʼn gesonde leefstyl.

Ek sal nog in die toekoms meer uitbrei oor ons gewoontes en verslanking. Dit is redelik direk gekoppel. Of ons gewoontes en ʼn gesonder liggaam. Ja siekte is nie iets wat maar net toevallig met jou gebeur nie. Wat jou bekruip soos Bryan Habana wat sy opponent in ʼn verrassende laagvat aarde toe trek 5 meter van die doellyn af nie. Nee dit is byna altyd die gevolg van ons eie gewoontes, denke, woorde, leefstyl, keuses en geloof. Maar dit is ʼn blog vir ʼn ander dag.

ʼn Gesonde leefstyl bly die kern vir baie ander resultate. Ek gaan jou nie vandag vermoei met die wetenskaplike bevindinge nie, maar daar is ʼn direkte verband met ʼn gesonder leefstyl en jou geluk, jou funksionering, jou energie en jou psigiese gesondheid of te wel emosionele intelligensie (EI).

Gesonde gewoontes sluit dinge in soos:

• Wat ons eet, wanneer ons eet en hoe ons eet.
• Ons oefenprogram.
• Tyd vir stilword, meditasie, gebed of net refleksie.
• Ons oggendprogram. Staan jy op net om die dag in te jaag, of maak jy tyd vir oefening, meditasie en gebed en strekoefeninge.
• Om genoeg water te drink.
• Saam met wie ons tyd spandeer.
• Om tyd te maak vir lees en nie net altyd besig met TV of Internet nie.
• Kry ons genoeg slaap in (dit verskil natuurlik van mens tot mens wat genoeg goeie slaap is).

Dit is maar enkele goeie en gesonde gewoontes wat ons daagliks of weekliks in nodig het om in ons program in te werk.

Dit is nodig om te dink hoe ons leef, hoe ons dink en praat.

Jy sal sien dat dit alles gewoontes is. Dinge wat ons aanleer om te doen en mee volhard om ʼn meer produktiewe, gelukkige en vervulde en gesonde lewe te leef.

Die gebrek aan goeie gewoontes, beteken nie jy het nié gewoontes nie.

Meeste mense se verskoning is gewoonlik hulle het nie tyd nie. Maar gaan sit mooi en dink hoe lyk jou gewoontes.

Vat dit meer tyd om water te drink as iets ongesond soos gas koeldrank?

Wat doen jy direk nadat jy opgestaan het?

Hoeveel tyd spandeer jy voor die TV, of in ander slegte gewoontes.

As jy mooi gaan dink is, dit nie ʼn kwessie van tyd nie. Dit is eerder ʼn kwessie van slegte of ander gewoontes. Jy het net nie besef jy het daardie gewoontes  nie. Die uitdaging, en dit waarmee ek jou graag help, is om gesonde gewoontes in plek te stel en te sien hoe baie dinge stelselmatig verander.

Dit is reg, jy het dikwels nie nodig om met baie moeite iets in jou lewe te verander nie. Kweek net die regte gewoontes aan en die verandering kom vanself. Positiewe resultate is die direkte resultaat daarvan.

Jy IS die produk van jou gewoontes. Goed of sleg. So jy sal die produk van goeie goed, positiewe, opbouende en betekenisvolle resultate word as jou gewoontes verander.

En jy kan dit een op ʼn slag doen. Dalk ʼn nuwe gesonde gewoonte elke twee weke of elke maand aanleer. Dink daaraan, in 12 maande se tyd sal jy twaalf goeie, gesonde en betekenisvolle gewoontes hê. Dink hoe jou lewe positief in die volgende 12 maande gaan verander!

Wat het dit met verslanking te doen?

Alles. Want as jy die regte gewoontes in jou lewe aangeleer het en daagliks toepas, het jy jou doelwit reeds halfpad bereik. Alles begin met ons denke en die gevolglike gewoontes wat ons het.

• As jy meer wil weet oor hoe ek jou hiermee of in baie ander areas kan help, besoek my webwerf: www.wilcoroberts.co.za.   

ʼn Besluit geneem is half gewin

Nuwejaarsvoornemens. Die begin van ʼn nuwe jaar is veral die tyd wanneer ʼn mens sekere begeertes uitspreek oor ʼn aspek van jou lewe waar jy veranderinge wil maak.

Daar kom soms ander sulke geleenthede ook, dikwels gepaardgaande met ʼn krisis soos ʼn siekte of wanneer jou gesondheid ʼn ernstige knou kry weens stres, gebrek aan oefening of slegte gewoontes.

In dié tye maak die meeste mense ʼn voorneme om dinge te verander.

Daar is egter een probleem met ʼn voorneme. Dit is slegs ʼn voorneme.

Volgens die verklarende woordeboek is ʼn voorneme iets wat jy beplan om te doen. Dus, iets wat jy graag wil doen, dalk al die rede in die wêreld het om te doen, iets of ʼn saak wat jy kognitief besef jy nie eintlik anders kan om te doen nie of helaas, so skuldig oor voel, dat jy iets daaromtrent wil doen.

Die enigste probleem is, is dat dit dikwels is waar dit bly. ʼn Verdienstelikheid waaroor jy vir ʼn oomblik, dikwels met of gegrond op daai skuldgevoelens, aan dink. Dan dink jy, jy moet tog dink om regtig iets hieromtrent te doen en waaroor jy baie verlig is as jy dit nie hoef te doen nie.

Die waarheid is egter dat ʼn voorneme alleen jou nêrens in die lewe gaan bring nie. Ons almal het daagliks tientalle voornemens, sommige vanuit diep innerlike oortuigings, anders doodeenvoudig gegrond op skuldgevoelens, samelewingsdruk of voorkeure of dalk maar net ʼn oulike gedagte of iets wat ons dink ons graag wil hê.

ʼn Voorneme is soos ʼn fantasie. Dit is ʼn plein ʼn droom oor iets wat jy nie oortuig is jou realiteit kan wees nie.

Die verskil en verandering in ʼn mens se lewe begin wanneer jy ʼn definitiewe besluit neem.

Daarom, wanneer jy ʼn vaste besluit geneem het, is jy al ver gevorder op jou pad om dit te bereik wat jy besluit het jy wil kry, doen of verander.

ʼn Besluit kan ons ook as ʼn doelwit beskryf. Iets wat jy definitief wil bereik, wat neergeskryf is, wat prakties uitvoerbaar is, wat positief is en met ʼn sperdatum.

Hierdie blog gaan oor verslanking.

Verslanking is egter meer as om net ʼn sekere aantal kilogram te weeg of in ʼn sekere nommer klere te pas.

Verslanking het te doen met ʼn gesonde leefstyl, met oefening, met om die regte nutrition’s in te kry en om lekker, maar heilsaam te eet.

Kortom, om holisties só ʼn lewe te lei wat jou maksimum voordeel gee in alle aspekte en terreine van jou menswees.

In die begin van die jaar kan jy dalk ʼn baie goeie voorneme hê, maar as jy aan die einde van dié jaar wil terugkyk en trots voel op jouself, gesond voel en leef en soos ʼn wenner die jaar wil uitgaan, neem daai besluit.

In die Zoë-HipnoterapieVerslankingskliniek is dít presies ons doel, om jou te help om vir die res van jou lewe gesond, positief, energiek en trots te leef in die wonder van jou eie liggaam.